काठमाडौं। धनुषाको मिथिला नगरपालिका–८ जमु निवासमा लुटेरा समुहले चलाएको गोली लागेर एकजना घाईते भएका छन् । करिब १०–१२ जनाको समुहमा आएका लुटेरा समुहले चलाएको गोली लागेर मिथिला–८ जमुनिवास चोक बस्ने ३८ बर्षीय पुष्पलाल श्रेष्ठ घाइते भएको प्रहरीले जनाएको छ ।
घाइते श्रेष्ठलाई जनकपुर अञ्चल अस्पतालबाट थप उपचारको लागि काठमाडौंको ट्रमा सेन्टर पठाइएको र लुटेराहरुको खोजी भइरहेको प्रहरीले जनाएको छ ।
गएराति श्रेष्ठको घरमा लुटेराहरुले लुटपाट गर्न खोजेपछि श्रेष्ठले प्रतिकार गर्दा उक्त समुहले श्रेष्ठमाथि गोली प्रहार गरेको थियो । लुटेराहरुले उनलाई घाईते बनाएर मंगलसुत्र र ब्रासलेट समेत गरी साँढे ६ तोला सुन, १५ तोला चाँदी र नगद २ लाख ५० हजार लुटपाट गरेको बताइएको छ ।
यसैबीच, काठमाडौंको कालिकास्थानस्थित पाथ सेट कन्सल्टेन्सी पछाडि पार्किङ गरिराखेको स्कुटर र सोही स्कुटरको डिक्कीमा रहेको ९ लाख रुपैयाँ चोरी भएको छ । सुनसरीको इटहरी स्थायी घर भई काठमाडौं अनामनगर बस्दै आएकी स्वेता उप्रेतीले पार्किङ गरि राखेको बा. ५० प ७६६३ नम्बरको स्कुटर र नगद चोरी भएको प्रहरीले जनाएको छ ।
