संयुक्त राष्ट्रसंघको ७३ औँ महासभामा सम्बोधनको क्रममा अमेरिकी राष्ट्रपति डोनाल्ड ट्रम्पले इरानको कडा आलोचना गरेका छन् । ट्रम्पले इरानले मध्य पूर्वभर अराजकता, हत्या र विनासको अवस्था सिर्जना गरेको आरोप लगाए ।
न्युयोर्कमा संयुक्त राष्ट्रसंघको महासभालाई सम्बोधनको क्रममा ट्रम्पले इरानसँगको परमाणु सम्झौता रद्द गर्ने आफ्नो निर्णयको पनि बचाउ गरे ।
इरानले छिमेकी देश, उनीहरुका सीमा र सम्प्रभुताको सम्मान नगरेको ट्रम्पले आरोप लगाए । इरानी नेतृत्वले देशका स्रोत साधानको प्रयोग आफूलाई धनी बनाउन र पूरै मध्यपूर्वमा तनावको अवस्था सिर्जना गर्नका लागि प्रयोग गरिरहेको ट्रम्पले दाबी गरेका छन् ।
[youtube https://www.youtube.com/watch?v=4KIpnPapquY]
इरानमाथि कडा आलोचना गरेका ट्रम्पले आफ्नो प्रशासन र कामको प्रशंसा पनि गरे ।
अमेरिकाको इतिहासमा आफ्नो नेतृत्वमा यसअघिका भन्दा धेरै काम भएको उनले दाबी गरे । उनले यस्तो दाबी गर्दैगर्दा दर्शक दीर्घामा रहेकाहरु हाँसेका थिए ।
अरु हाँसेको देखेपछि ट्रम्प पनि हाँसेर आफूले यस्तो प्रतिक्रियाको अपेक्षा नगरेको बताए । उनले फेरि अमेरिका अहिलेको जस्तो बलियो, आर्धिक रुपले सबल वा सुरक्षित यसअघि कहिले पनि नरहेको दाबी गरे ।
ट्रम्पले सम्बोधनको क्रममा चीनप्रति कडा र उत्तर कोरियाप्रति तुलनात्क रुपमा नरम व्यवहार देखाए। ट्रम्पले अमेरिकालाई आफ्नो तरिकाले चल्न दिनका लागि आह्वान गरे ।
आफूले कुनै पनि देशलाई यसरी चल या यसो गर नभन्ने र अरुबाट पनि त्यसकै अपेक्षा रहेको ट्रम्पले बताए ।
