काठमाण्डाै ।
कोरोना भाइरस संक्रमणपछि विराटनगरमा उपचार गराइरहेका ६ जना भारतीय नागरिक निको भएका छन् ।
पछिल्लो पटक गरिएको तीनवटा परीक्षणमा कोरोना भाइरस संक्रमण नदेखिएपछि उनीहरुलाई डिस्चार्जको तयारी गरिएको हो ।
उदयपुरको त्रियुगा नगरपालिका भुल्केस्थित मस्जिदमा बसेका भारतीय जमातीमध्ये ५ र ६ वैशाखमा १३ जनामा कोरोना संक्रमण पुष्टि भएको थियो ।
उनीहरुमध्ये ६ जना निको भएकाे प्रदेश १ सामाजिक विकास मन्त्री जीवन घिमिरेले जानकारी दिए ।
संक्रमण मुक्त भएकाहरुको कोशी अस्पतालको ल्याबमा तीन पटक परीक्षण गरिएको थियो । परीक्षण गर्दा ६ जनाको रिपोर्ट नेगेटिभ आएको कोरोना अस्पताल विराटनगरका प्रमुख डा. दीपक सिग्देलले जानकारी दिए ।
उनीहरुलाई बुधबार बिहान डिस्चार्ज गरिने छ । डिस्चार्जपछि एकसाता विराटनगरको रानीमा स्वास्थ्यकर्मीको निगरानीमा राखिनेछ ।
विराटनगरको कोरोना विशेष अस्पतालमा ३१ जनाले उपचाररत छन् । विराटनगरको कोरोना विशेष अस्पतालमा उदयपुरमा संक्रमण पुष्टि भएका मात्र २८ जना उपचार गराइरहेका छन । बाँकी ३ जनामध्ये दुईजना झापा र एक जना भोजपुरका छन् ।
