काठमाण्डाै ।
संसदको पाँचौं अधिवेशन आज शुक्रबारबाट सुरु हुँदैछ । राष्ट्रपति विद्यादेवी भण्डारीको आह्वानमा संसदको पाँचौं अधिवेशन आजबाट सुरु हुन लागेको हो । शुक्रबार अपराह्न ४ बजे दुवै सदन (प्रतिनिधिसभा र राष्ट्रियसभा) को बैठक बस्ने संसद् सचिवालयले जनाएको छ ।
प्रतिनिधिसभा बैठकको अध्यक्षता उपसभामुख शिवमाया तुम्बाहाम्फेले गर्नेछिन् । महिलामाथि यौन दुव्र्यवहार गरेको आरोपपछि कृष्णबहादुर महराले सभामुखबाट राजीनामा दिएका छन् । रिक्त सभामुख पद पूर्ति हुन बाँकी रहेकाले आजको बैठकको अध्यक्षता तुम्बाहाम्फेले गर्न लागेकी हुन् ।
बैठकको सुरुमा दुवै सदनमा राष्ट्रपति विद्यादेवी भण्डारीको संसद् आह्वानसम्बन्धी पत्र बाचन गरेर सुनाइने कार्यक्रम छ । प्रतिनिधिसभामा तुम्बाहाम्फे र राष्ट्रिय सभामा राष्ट्रिय सभाका अध्यक्ष गणेशप्रसद तिमिल्सिनाले राष्ट्रपतिबाट प्राप्त पत्र वाचन गरेर सुनाउने छन् ।
राष्ट्रियसभाको कार्यसूची तय, प्रतिनिधिसभाको बाँकी
राष्ट्रिय सभाको बिहीबार बिहान ११ बजे कार्यव्यवस्थाको बैठक बस्यो । जुन बैठकले अधिवेशनको पहिलो दिनको कार्यसूची तय गरेको छ ।
राष्ट्रिय सभाको पहिलो दिनको सम्भावित कार्यसूचीमा दलीय आधारमा संसदीय दलका नेताहरूले स्वागत मन्तव्य राख्ने उल्लेख छ ।
स्वागत मन्तव्यपछि मन्त्रिपरिषदको गठनसम्बन्धी राष्ट्रिपतिको कार्यलयबाट प्राप्त पत्रको व्यहोरा पढेर सुनाउने कार्यसूची छ । केही समय अघि सरकारले मन्त्रिपरिषद पुर्नगठन गरेको थियो ।
राष्ट्रिय सभाले शुक्रबार विभिन्न चार जना पूर्व सांसदहरुको निधनमा शोक प्रस्ताव पारित गर्ने कार्यसूची पनि तय गरेको छ ।
प्रतिनिधिसभा बैठकको कार्यसूची भने तय हुन बाँकी छ । तर, सम्भावित कार्यसूची सचिवालयले तयार पारिसकेको सूचना अधिकारी दशरथ धमलाले जानकारी दिए ।
प्रतिनिधि सभाको सम्भावित कार्यसूची पनि राष्ट्रिय सभाको जस्तै छ । तर, कार्यव्यवस्थामा थपघट हुन सक्ने सूचना अधिकारी धमलाले जानकारी दिए । प्रतिनिधि सभाको कार्यब्यवस्थाको बैठक शुक्रबार दिउँसो १ बजे बस्नेछ ।
