बुधबार साँझ ८ बजेतिर कालोपुलमा २० वर्षीया जेनी खड्कामाथि एसिड प्रहार भयो । एसिडले जेनीको शरीरको विभिन्न भागहरु जलेको प्रहरीले जनाएको छ ।

जेनीलाई एसिड हानेको अभियोगमा प्रहरीले घटनाको दुई घण्टामै २७ वर्षीय विष्णु भुजेल उर्फ विकास पक्राउ परे । प्रहरी अनुसन्धानका क्रममा उनी जेनीकै श्रीमान भएको खुल्न आयो । महानगरीय प्रहरी परिसर काठमाडौंको टोलीले भुजेललाई काँडाघारी सनसिटी अपार्टमेन्ट नजिकैबाट पक्राउ गरेको हो ।

परिसरका प्रवक्ता डीएसपी होविन्द्र बोगटीका अनुसार अपार्टमेन्ट नजिकैको एक भट्टी पसलमा बसेर मदिरा सेवन गरिरहेको अवस्थामा उनी पक्राउ परेका थिए । श्रीमतीलाई कालोपुलमा एसिड प्रहारपछि उनी सो भट्टीमा मदिरा सेवन गर्न पुगेका थिए ।

प्रहरीका अनुसार भुजेलले विभिन्न प्रलोभन देखाउँदै जेनीलाई १० कक्षामा पढ्दापढ्दै गर्दा ६ वर्षअघि भगाएका थिए । त्यतिबेला जेनी १४ वर्षकी थिइन् ।

बिहे भएको ३ वर्षपछि उनीहरुले एक सन्तान (छोरा) लाई जन्म दिए । उनीहरुको ३ वर्षका छोरा छन् । प्रहरीका अनुसार भुजेलको जेठी श्रीमती पनि रहेको जेनीले पछिमात्रै थाहा पाएकी थिइन् । सोही थाहा पाएपछि उनीहरुबीच असमझदारी बढ्न थालेको र पछिल्लो समय उनीहरु छुट्टाछुट्टै बस्दै आएका थिए । भुजेल काभ्रेमै बस्थे भने जेनी कालोपुलमा बुबाआमासँग बस्दै आएकी थिइन् ।

प्रहरीका अनुसार बेला–बेला भुजेलले जेनीलाई आफूसँग बस्न आग्रह गरेपनि जेनीले नमानेपछि कुनै पनि बेला मारिदिने धम्की दिने गर्थे । विकासले प्रहरी समक्ष श्रीमती आफूसँग बस्न नमानेपछि एसिड हानेको स्वीकारेका छन् ।

‘विष्णुले जेनीलाई धेरैपटक सँगै बस्न बोलाउने गरेपनि जेनीले दोस्री श्रीमती भएको भन्दै माइतमा नै बसेकाले दुई बीचमा विवाद सुरु भएको अनुसन्धानबाट खुलेको छ,’ डिएसपी बोगटीले भने । विष्णुले जेनीलाई एसिड प्रहार गर्दा जेनीकी ९ वर्षकी बहिनी पनि साथैमै रहेको एक प्रत्यक्षदर्शीले बताए । यद्यपि जेनीकी बहिनीलाई भने एसिड लागेको छैन । भुजेलकाे पहिलाे श्रीमती हाल वैदेशिक राेजगारीकाे क्रममा खाडीमुलूकमा रहेकाे बताइएकाे छ ।

एसिड हानेलगत्तै भुईंमा ढलेकी जेनीलाई २० मिनटमै चाबहिलस्थित ओम अस्पताल पुर्याइएको थियो । त्यहाँ सामान्य उपचार भएपछि उनलाई कीर्तिपुरस्थित फेक्ट अस्पताल रिफर गरियो ।

हाल उनको कीर्तिपुरस्थित फेक्ट अस्पतालमा उपचार भइरहेको छ । परिसरका प्रवक्ता डीएसपी बोगटीका अनुसार जेनीको अहिले अप्रेशन हुँदैछ । जेनीको अवस्था चिन्ताजनक रहेको अस्पताल स्रोतले जनाएको छ । यसैबीच आर्थिक अवस्था कमजोर रहेकाले उपचारमा समस्या भएको जेनीको परिवारले जनाएको छ ।