कैलाली ।
मुलुकको विभिन्न ठाउँबाट पैदल हिडेर कैलालीको चिसापानीसम्म पुगेका व्यक्तिलाई एक मनकारी वडा अध्यक्षले गन्तव्यसम्म पुग्न सहयोग गरिरहेका छन् ।
लम्कीचुहा नगरपालिका- ३ का वडा अध्यक्ष भक्तबहादुर चलाउनेले चिसापानीसम्म पुगेका व्यक्तिहरुलाई घरसम्म पुग्न सहयोग गरिरहेका छ्न । सो वडामा पर्ने चिसापानीलाई सुदूरपश्चिमकै प्रवेशद्वार मानिन्छ ।
सङ्घीय राजधानी काठमाण्डौंसहित विभिन्न जिल्लाबाट मजदुर, विद्यार्थी हप्तादिन पैदल हिडेर आइरहेका छन् । गाडीको व्यवस्था गरेर उनीहरुलाई गन्तव्यसम्म पुग्न सहयोग गरिरहेको वडा अध्यक्ष चलाउनेले बताए ।
‘पैदल यात्रीका खुट्टाको पैतला फुटेको देख्दा निकै दया लाग्छ’, उनले भने । ‘विभिन्न निकायको गाडी सहयोग माँगेर उनीहरुलाई गन्तव्यतर्फ पठाउने काम गरिरहेको छु ।’ बन्दाबन्दीको क्रममा अहिलेसम्म आएका एक हजार तीन जनाभन्दा बढी व्यक्तिलाई गन्तव्यतर्फ पठाइएको छ ।
व्यक्तिहरु पैदलै हिडेर दिनदिनै आउनेक्रम अझै जारी रहेको उनले बताए । ‘आजमात्रै करिब तीन सय जनालाई स्कुलको गाडीमार्फत गन्तव्यतर्फ पठाइएको छ’, उनले भने । त्यसरी आउनेमा विभिन्न ठूला परियोजनामा काम गर्नका लागि गएका मजदुरहरु बढी रहेको छन । त्यसमध्ये पहाडतर्फ जाने व्यक्तिलाई अत्तरिया प्रहरी र कैलालीका व्यक्तिलाई सम्बन्धित स्थानीय तहसंग समन्वय गरेर पठाउने कार्य भइरहेको छ ।
‘स्थानीय तहसंग समन्वय गरेर पठाउँदा उनीहरुलाई क्वारेन्टाइनमा राख्न सहज पनि भएको छ’, वडा अध्यक्ष चलाउनेले भने । पहाडी जिल्लातर्फ जाने मजदुर, विद्यार्थीलाई अत्तरिया प्रहरीसंग समन्वय गरेर पठाइ रहेको वडा अध्यक्ष चलाउनेले बताए ।
बिगत धेरै दिन देखि उहाँले सयौ अलपत्र परेका यात्रुलाई गन्तव्य सम्म पुगाउन सहयोग गरि राख्नु भएको छ ।
