काठमाण्डाै ।
ट्राफिक व्यवस्थापनको लागि मोटरसाइकल बक्स बनाउने योजना यही असारबाट कार्यान्वयनमा ल्याइने भएको छ । याे नेपालमा माेटरसाइकल तथा स्कुटर चालककाे लागि नयाँ नियम हुनेछ ।
सडक विभाग अन्तर्गतको सडक सुरक्षा तथा ट्राफिक शाखाका अनुसार हालै मोटरसाइकल बक्स निर्माणका लागि टेन्डर दिइएको छ । चालु आर्थिक वर्ष भित्र सम्पन्न गर्ने गरि टेन्डर दिए पनि जेठसम्ममा मोटरसाइकल बक्स निर्माण गरिसक्ने सडक सुरक्षा तथा ट्राफिक शाखा प्रमुख दिप बाराहीले जानकारी दिए ।
केही समय अघि मोटरसाइकल बक्स निर्माणको विषयमा जाइकाले अध्ययन गरेकाे थियो । उक्त संभाव्यता अध्यनपछि मोटरसाइकल बक्स निर्माणको टेन्डर पिआर विनायक जेभीलाई दिइएको शाखाले जानकारी दिएको छ ।
सुरुको चरणमा नयाँ बानेश्वरमा मोटसाइकल बक्स निर्माण गर्न लागिएको हो । मोटरसाइकल बक्स निर्माण कार्य सम्पन्न हुना साथ यसलाई कार्यान्वयनमा ल्याइने बाराहीले जानकारी दिए ।
‘हामीले असारसम्मको म्याद दिएका छाैँ तर, जेठमै काम सकिन्छ, सकिए लगतै यसलाई कार्यान्वयनमा ल्याउने छौँ,’ बाराहीले मेरोअटोसँग भने ।
नयाँ बानेश्वरमा मोटरसाइकल बक्स प्रोजेक्ट सफल भएमा अन्य स्थानमा पनि त्यसलाई कार्यान्वयनमा ल्याइन उनले जानकारी दिए ।
के हो मोटसाइकल बक्स ?
मोटरसाइकल बक्स भनेको ट्राफिक लाईटमा दुई पाङ्ग्रे सवारीसाधन रोक्न छुट्याइएको स्थान हो । जहाँ मोटरसाइकल र स्कुटरमात्रै रोक्न पाइने छ । उक्त बक्स अन्य सवारीसाधन रोक्ने स्थानभन्दा अगाडि हुने छ । बक्स निर्माणपछि सुरुको लेनमा बाइकहरु रोकिने छन् भने त्यसपछि अन्य सवारी रोक्नु पर्ने हुन्छ । विश्वमै सडक जाम हुँदा सुरुमा मोटरसाइकल रोक्ने र त्यसपछि अन्य सवारी रोक्ने गरिएको छ ।
पछिल्लो समय मोटरसाइकल तथा स्कुटरहरु सडक जाम पर्दा बीच बीचबाट पस्ने र त्यसले सडक दुर्घटना बढ्दै गएकाले यस्तो नियम कार्यान्वयनमा ल्याउन लागिएको बाराहीले बताए ।
