काठमाण्डाै ।
इटहरी उपमहानगरपालिकाका मेयर द्वारिकालाल चौधरीले बुधबार अन्तरवार्ताका क्रममा एक पत्रकारलाई दुर्व्यावहार गरेकाछन । एक कर्मचारीलाई कुटपिट गरेको र अपशब्द बोलेको विषयमा प्रश्न गरिँदा आक्रोशित बनेका मेयरले पत्रकारलाई लोपारेको फुटेज बाहिरिएको छ ।
बुधबार उपमहानगरपालिकाको कार्यालय परिसरमा स्थानीय पत्रकारको एक समूहले मेयर चौधरीसँग कार्यालय अगाडिको पोखरीको डिलमा उभिएर प्रश्नोत्तर गरेका थिए । त्यस क्रममा चौधरीले महानगरपालिकाका कर्मचारी मनोज दाहाललाई अपशब्द बोलेको र कुटपिट गरेको विषयमा पत्रकारले सोधेका थिए । त्यसपछि चौधरी तात्तिए ।
‘अपशब्द ? कोही भ्रष्ट काम गर्छन्, त्यसलाई के फूलमाला लाउनु मैले ? मेरै पार्टीका नेता हुन् भने पनि छोडि्दनँ,’ मेयर चौधरीले भने ।त्यसपछि उनले गर्वसाथ सुनाए, ‘रामप्रसाद चौलागाईं (पूर्वएमालेका जिल्ला नेता) लाई त अस्ति मैले पिटेँ नि । भूमाफिया, खानेपानीमा भ्रष्टाचार गर्ने, पाइपलाइन ओछ्याउने, ट्याङ्की निर्माणमा, जग्गा खरिदमा सबैमा भ्रष्टाचार गर्ने अनि आज मुठ्ठी कसेर लालसलाम ? नेपाली क्रान्ति जिन्दावाद ? माक्र्सवाद लेनिनवाद जिन्दावाद ? नेपाल कम्युनिष्ट पार्टी जिन्दावाद ?’
पूर्वएमालेका सुनसरी प्रमुख रहिसकेका मेयर चौधरीले थपे, ‘मैले महान चिनियाँ सर्वहारा सांस्कृतिक क्रान्ति पढेको छु । त्यसको प्रभाव मलाई छ । त्यसैले महान नेपाली सर्वहारा क्रान्ति सुरु भइसकेको छ । मेयरको एक्सन सुरु भइसक्यो ।’पत्रकारले थप सोध्छन्, ‘तपाईंले सिसी क्यामरा अफ गरेर, ढोका लगाएर मनोज दाहाललाई हानेको हो ? यसरी कानून हातमा लिन मिल्छ ?’
मेयर पडकिन्छन्, ‘यस्ता फोकटिया कुरा नगर्नुस् । अब सुन्नुस । म कानूनको विद्यार्थी त होइन, तर संकटका बेलामा राज्यले मौलिक हक के गर्छ भन्छन् नि ? के गर्छ रे ? (उनी निलम्बन भन्न खोज्दै थिए, शब्द फुरेन) । त्यसलाई के भन्छन् ? बन्दी प्रत्यक्षीकरण बाहेक, सभा-जुलुस सबै ऊ हुँदोरहेछ । अनि आवधिक निर्वाचन टरेर जान्छ संकटका बेला । त्यसैले शासकले कानून हातमा लिन्छ । लिन्छ शासकले ।’
पत्रकार : तर यो तपाईंको अधिकार क्षेत्र होइन नि ?’
मेयर : मेरो होइन भने कसको हो ?
पत्रकार : ‘संसदको हो नि
चौधरी ६ पटक ‘को संसद ? को संसद ?’ भन्छन् ।
पत्रकार : ‘प्रतिनिधिसभा छ, राष्ट्रिय सभा छ ।’
चौधरी : ‘यहाँ छ प्रतिनिधिसभा ? राष्ट्रिय सभा ?’
पत्रकार : ‘तपाईंको भन्दा दुई किलोमिटर अगाडि अख्तियार छ ।’
मेयर : ‘जानु नि त अख्तियार, के-के गर्नुपर्छ गर्नु नि ।’
पत्रकार : ‘हातपातको कुरा चाहिँ के हो ?’
मेयर : ‘देखाउनु न त प्रमाण । यस्ता फोकटिया कुरा नगर्नुस् ।’
त्यसपछि पछिल्लो प्रश्न सोध्ने पत्रकारलाई औंल्याउँदै भन्छन्, ‘ए भाइ, पत्रकार हौ ? कति वर्ष पुग्यौ ?’
पत्रकारले २० वर्ष पुगेको बताउँछन् ।
अनि मेयर चौधरीले उमेरको धाक लगाउँछन्, ‘मेरो कान्छो छोरा २४ वर्षको भयो । राम्रो प्रश्न गर । तिमीले मलाई लोकतन्त्र, मौलिक हक, मानवअधिकार, राजनीतिकशास्त्र ऐन-कानून पढाउनुपर्दैन । सात वर्ष मुद्दा गरेको मोही किसानको छोरा हुँ । तिम्रो प्रश्नको जवाफ दिन चाहन्न ।’
यति भनिसकेर मेयर चौधरी डोनाल्ड ट्रम्पको शैलीमा अंग्रेजीमा बोल्न थाल्छन्- ‘आई डन्ट लाइक टु आन्सर योर क्वैस्चन । यू आर बायस्ड ।’
पत्रकारले अर्को प्रसंग निकाल्छन्, जसले चौधरीलाई पूर्णरुपमा उत्तेजित बनाउँछ ।
पत्रकार : ‘खरिद नियम विपरीत हुँदाहुँदै पनि मेयर भवनको भुक्तानी दिने कार्यपालिकाले निर्णय किन गर्यो ?’
मेयर : ‘कार्यपालिकाले गरेको छैन । देखायौ भने आजदेखि राजनीतिबाट सन्यास लिन्छु ।’
त्यसपछि मेयरले जंगली पारा झिक्छन् र पत्रकारको अनुहारमै हात पुर्याएर भन्छन्, ‘लोपारिदिन्छु म तिमीलाई । त्यस्ता कुरा नगर । लोपारिदिन्छु । लोपारिनै दिन्छु यस्तो बायस कुरा गरेऊ भने ।’
यसो भन्दै उनले तीनपटक पत्रकारको अनुहारमा लोपार्छन् । दुईपटक हावामा लोपार्छन्, तेस्रोपटक अनुहारमै हात पुर्याउँछन् ।
पत्रकारमाथि यस्तो दुर्व्यवहार भएको विषयलाई लिएर नेपाल पत्रकार महासंघले विरोध जनाएको छ । महासंघको सुनसरी शाखाले विज्ञप्ति जारी गर्दै पत्रकार कृष्ण बहाव भट्टराई र विकल रेग्मीमाथि मेयर चौधरीले गरेको दुर्व्यवहार प्रेस तथा अभिव्यक्त स्वतन्त्रतामाथिको हस्तक्षेप भएको उल्लेख गरेको छ ।
मेयर चौधरीले पत्रकार भट्टराईलाई लोपारेका थिए भने अर्का पत्रकार रेग्मीलाई यी यसरी कठालो समाएँ भन्दै उदाहरण दिने क्रममा कठालो समातेका थिए ।
मेयर चौधरीले बुधबार आफ्नै कार्यालयमा एक कर्मचारीलाई भ्रष्टाचारी भन्दै कठालो समातेका थिए भने अर्का कर्मचारीलाई दुई चड्कन लगाएका थिए ।
उता चौधरीले कुटपिट गरेपछि इटहरी नगरपालिकाका कर्मचारीहरु मेयरविरुद्ध आन्दोलनमा उत्रिएका छन् । बुधबार कर्मचारीहरुले मेयरविरुद्ध नाराबाजी गर्नुका साथै कार्यालयमा अनिश्चितकालीन तालाबन्दी लगाउने घोषणा गरेका छन् ।
