सप्तरीबाट किर्ते नागरिकता बनाएकाको सूची थपिँदै गएको छ । यहाँबाट कुख्यात भारतीय अपराधीदेखि, भारतीय र बंगलादेशीले नेपाली नागरिकताको प्रमाणपत्र बनाएको तथ्य सार्वजनिक भइरहेका बेला थप तीनवटा फेला परेका छन् । ती तीनवटै रकम लिएर चिया पसल, होटेलका कोठामा बनाइएको खुलासा भएको छ ।
पछिल्लोपटक भारतीय नागरिकहरू मन्टुकुमार साह, रामरित रजक र रवि रौनियारको किर्ते नागरिकता फेला परेको हो ।
advertisement
सप्तरी जिल्ला ठेगाना देखाई किर्ते नागरिकता लिएका एक भारतीय नागरिकले ६० हजार रुपैयाँमा नेपाली नागरिकता लिएको प्रहरीसमक्ष बयान दिएका छन् । केही दिनअघि सुनसरीको इटहरी प्रहरीले पक्राउ गरी आवश्यक कारबाहीका लागि सप्तरी पठाएको भारतीय नागरिक रवि रौनियारले नागरिकता बनाउनुअघि ५० हजार र बनिसकेपछि १० हजार दिएर राजविराजको नेताचोकस्थित चिया पसलमा नेपाली नागरिकताको प्रमाणपत्र लिएको बयान दिए ।
