वीरगंजमा बिजुलीको बक्यौता नतिर्ने ५० उद्योगमा प्राधिकरणको डण्डा, धमाधम बिल तिर्न थाले

आइतवार, अशोज १४, २०७५, । 

नेपाल विद्युत प्राधिकरण वीरगंज वितरण केन्द्रले बिद्युत चुहावट नियन्त्रण गरी बक्यौता उठाउने काम तीब्र बनाएको छ।

वीरगंज वितरण केन्द्रका प्रमुख मुनिन्द्र ठाकुरका अनुसार पछिल्लो ६ महिनामा करिब  ९ करोड रुपैयाँ महसुल उठेको छ । केन्द्रले हाल पछिल्लो बक्यौता तिराउने काम प्रभावकारी रुपमा अघि बढाएको छ ।

वीरगंज–पथलैया औद्योगिक कोरिडोरमा ६ सय उद्योगमा टिओडी मिटर जडान भएकोमा थप १५ वटा उद्योगमा करिब २ करोडको छुट बिलिङ भएको अनुसन्धानबाट देखिएकोले तिनीहरुको फाइल प्राधिकरणको मुख्य कार्यालय काठमाडौंमा पठाएको वितरण केन्द्र प्रमुख ठाकुरले बताए ।

‘पहिले २५ वटा उद्योगमा छुट विलिङ भएको पत्ता लाग्यो,उनीहरुसंग उक्त रकम तिराई सकेका छौं,जसमा विश्वकर्मा सिमेन्टले साढे ३ करोडमा एक करोड ३२ लाख तिरेको छ,त्यस्तै प्रकृतिका अन्य १५ वटा उद्योगको फाइल प्राधिकरणको बोर्डमा पठाएका छौ, उताबाट तिराउने महसुल निर्धारण भएर आएमा उनीहरुबाट त्यो रकम असुल गरिन्छ,’उनले भने ।

साथै हाल अनुसन्धानको दायरमा रहेका ५० भन्दा बढी उद्योग मध्येमा पनि ३४ वटा उद्योगमा छुट विलिङको कारण पत्ता लागिसकेको र उनीहरुको पनि फाइल खडा गर्ने कार्य भइरहेको उनले बताए । टिओडी मिटर आधुनिक र वैज्ञानिक मिटर हो,यसले २४ घण्टामा कति विद्युत खपत भएको त्यसको रेकर्ड राख्दछ ।

औद्योगिक कोरिडोरका उद्योगलाई विहान ५ बजे देखि साँझ ५ बजेसम्म एउटा दर, साँझ ५ बजेदेखि राती ११ बजे सम्म दोस्रो र राती ११ बजे देखि विहान ५ बजे सम्म तेस्रो अर्थात सबै कम शुल्क लाग्ने गर्छ ।

बेलुकाको समयमा सबैभन्दा बढी महँगो पर्छ । प्रतिदिन १२० मेगावाटको विद्युत खपत हुने केन्द्र अन्तर्गतका क्षेत्रमा पहिले १० प्रतिशत विद्युत चुहावट हुन्थ्यो अहिले तथ्यांक ऋणात्मक भएको छ। हाल विद्युत चुहावट माइनस २ प्रतिशत देखिएको केन्द्रले जनाएको छ।

केन्द्र  अन्तर्गत ४५ हजार साना ग्राहक छन् भने ६ सयभन्दा बढी औद्योगिक क्षेत्रका ठूला ग्राहक छन् ।

बिजुली चोरलाई समातेर ९३ वटा मुद्दा मार्फत ३३ लाख, लाइन पुनः जडान वापत  ४ करोड ६७ लाख र ८१ जनालाई कालोसूची मार्फत ३९ लाख ४६ हजार र टिओडी(टाइम अफ डे) मिटरमा छुट बिलिङ भएको २५ उद्योगबाट साढे ३ करोड रुपैयाँ गरी  ८ करोड ८९ लाख रुपैया संकलन भएको वितरण केन्द्र प्रमुख ठाकुरले बताए।

नियमित मासिक विद्युत महसुल संकलन भने एक करोड रुपैयाँको हाराहारीमा हुँदै आएको छ । वितरण केन्द्र वीरगंजको वार्षिक करिब ४ अर्ब रुपैयाँको संकलन गर्ने लक्ष्य राखिएको  उनको भनाई छ।

चुहावट गर्ने ७० जना पक्राउ

वीरगंज, पोखरिया र कलैया  वितरण केन्दले छुटाछुटै गस्ती परिचालन गरी आफनो क्षेत्रबाट ७० विजुली चुहावट गर्नेलाई पक्राउ गरी जरिवाना तिराएको  जनाएको छ ।

कलैयाको टोलीले विभिन्न विद्युतीय उपकरणसहित ३९ जना,वीरगंजले १८ जना र पोखरियाले १३ जना गरी जम्मा ७० जनालाई नियन्त्रणमा लिइ करिब ५ लाख  रुपैयाँभन्दा बढीको जरिवाना तिराएको हो ।

यो सामाग्री पढेर तपाईलाई कस्तो महसुस भयो ?

आइतवार, अशोज १४, २०७५ (September 30, 2018, 1:27 pm) मा द्वारा अपराध अन्तर्गत प्रकाशित

प्रतिकृया दिनुहोस

Leave a Reply

Your email address will not be published. Required fields are marked *


फेसबुकबाट प्रतिक्रिया

भर्खरै