काठमाण्डाै ।
पाँचथरको मिक्लाजुङ गाउँपालिका–३ आरुबोटेमा ९ जनाको ज्यान जाने गरि भएको हत्याकाण्डमा एकजनाको मात्रै संलग्नता रहेको हुन सक्ने प्रहरीको प्रारम्भिक अनुसन्धानमा देखिएको छ ।
घटनामा बाँच्न सफल भएकी बालिकाले दिएको जानकारी र घटनाको प्रकृति हेर्दा प्रारम्भिक अनुसन्धानमा एकजनाको मात्रै संलग्नता रहेको हुन सक्ने आँकलनमा आफूहरु पुगेको पाँचथरका प्रहरी प्रमुख प्रहरी नायब उपरीक्षक नरेन्द्र कुँवरले देश सञ्चारलाई जानकारी दिए ।
उनले भनेका छन्, ‘अहिले हाम्रो अनुसन्धान एकजना मात्रै संलग्न रहेको भन्ने मान्यतामा आधारित रहेको छ । घटना भएकै गाउँपालिकाको अर्को वडामा आत्महत्या गरिएका युवकको संलग्नता हत्यामा रहेको हुन सक्ने अनुमान छ ।’
मिक्लाजुङ–७ मा एक युवकको शव झुण्डिएर आत्महत्या गरेको अवस्थामा भेटिएको छ । प्रहरी नायब उपरीक्षक कुँवरले आफूहरु हत्या भएको ठाउँबाट अनुसन्धानका लागि युवकको शव रहेको ठाउँमा जाँदै गरेको बताएका छन् ।
तर फोरेन्सिक रिपोर्ट नआएकाले यकिन गरेर घटनामा यति जनाकै संलग्नता थियो भन्न सक्ने अवस्था नरहेको उनले स्पष्ट पारेका छन् ।
