काठमाण्डाै ।
मंगलबार ललितपुरमा एक पुरुषले महानगरीय प्रहरी परिसर ललितपुर कन्ट्रोलको १०० नम्बरमा फोन गरे, भने- ‘आज ठूलो अपराध गर्दैछु, अनि आफु पनि मर्छु !’ तर ‘ब्लफ कल’ भएकाले प्रहरीलाई हैरानी दियाे ।
आश्चर्यजनक फोन आएपछि महानगरीय प्रहरी परिसर ललितपुरकी एसएसपी किरण बज्राचार्यले ती पुरुषको खोजी गर्न निर्देशन दिइन् । त्यसरी फोन गर्ने व्यक्ति हुन्, महालक्ष्मी नगरपालिका–४ कमल पोखरी बस्ने ३८ वर्षीय रामकुमार श्रेष्ठ भएकाे पत्ता लाग्याे। कन्ट्रोलमा फोन आएको करिब ५० मिनेटपछि प्रहरीले उनलाई पक्रियो । काभ्रे घर भएका रामकुमारलाई महानगरीय प्रहरी परिसर सातदोबाटोमा राखिएको छ ।
उनीमाथि थप अनुसन्धान र कारवाही गरिने ललितपुरकी एसएसपी किरण बज्रचार्यले बताईन् । उनले भनिन्- ‘अपराध गर्छु भनेर घोषणा गर्न पाईंदैन, हामी उनको मानसिक अवस्था परीक्षण गराएर मुद्धा चलाउँछौं ।’
प्रहरीलाई फोन गर्दा मदिरा पिएको र रामकुमारको पारिवारिक समस्या रहेको प्रहरीको प्रारम्भिक अनुसन्धानबाट थाहा भएको छ ।
