अनलाइनबाट तामाकोसीको सेयर आवेदन भर्न पाइने

विदेशमा बस्ने दोलखावासी नेपाली नागरिकले माथिल्लो तामाकोसी जलविद्युत् आयोजनामा अनलाइनबाट सेयर आवेदन भर्न पाउने भएका छन् । बिक्री प्रबन्धक नागरिक लगानी कोष र सहायक प्रबन्धक सनराइज क्यापिटल तथा माथिल्लो तामाकोसी आयोजनाको वेबसाइटमार्फत सेयर आवेदन फाराम डाउनलोड गरी भर्न सक्ने व्यवस्था मिलाइने आयोजनाले जनाएको छ ।

विदेशमा रहेका दोलखालीले अनलाइन फाराम भरी पठाउने र परिवारका सदस्यले सो फाराम संकलन केन्द्रमा बुझाई रकम जम्मा गरेपछि लगानी सुनिश्चित हुनेछ । बिक्री प्रबन्धक कम्पनीले सेयर निष्कासन सुरु हुनुअगावै फाराम वेबसाइडमा राख्ने आयोजनाका प्रवक्ता डा. गणेश न्यौपानेले बताए ।

वैदेशिक रोजगारीमा रहेकाको पनि बैंक खाता नभएमा परिवारको सदस्यकै खातामार्फत सेयर आवेदन दिन पाउनेछन् । काठमाडौंमा बसोबास गर्नेले सोही ठाउँबाटै र जिल्लाका नागरिकले स्थानीय तहबाटै सेयर आवेदन भर्न पाउने व्यवस्था मिलाइने भएको छ ।

दोलखाका जनप्रतिनिधि, राजनीतिक दल, नेपाल विद्युत् प्राधिकरण, धितोपत्र बोर्ड, लगानी कोष र माथिल्लो तामाकोसी आयोजनाका पदाधिकारीबीच भएको छलफलपछि त्यस्तो निर्णय भएको हो । छलफलमा काठमाडांै, भक्तपुर र ललितपुरमा बस्दै आएका दोलखावासीलाई निश्चित अवधिभित्र उपत्यकाकै निश्चित बैंकबाट सेयर आवेदन संकलन गर्न नेपाल धितोपत्र बोर्ड सहमत भएको छ । यो सहमतिअनुसार काठमाडौं उपत्यकामा बसोबास गर्ने ठूलो संख्याका दोलखाली नागरिक सेयर आवेदनका लागि दोलखा धाउनुनपर्ने भएको उनले बताए ।

बर्बायाम, सडकको दुरावस्थाका कारण काठमाडौंदेखि दोलखासम्मको सडक यात्रा कष्टकर हुनेलगायतका कारण उपत्यकामा बस्ने दोलखावासीको सेयर आवेदन उपत्यकाबाटै संकलन गर्ने सहमति भएको हो । जिल्लामा रहेका दोलखावासीको हकमा भने विभिन्न २१ स्थानबाट सेयर संकलन गरिने भएको छ । माथिल्लो तामकोसी आयोजनाका प्रमुख विज्ञानप्रसाद श्रेष्ठले बैंकको शाखा विस्तार भएका स्थानमा सोहीमार्फत २१ वटा वडाबाट सेयर आवेदन संकलन गरिने बताए । उनले बैंकको पहुँच नभएका दुर्गम वडामा घुम्ती संकलन केन्द्रको व्यवस्था गरिने जानकारी दिए ।

दुर्गम र विकट गाउँमा आवेदन सेयर आवेदन संकलन गर्न स्थानीय सरकार र प्रशासनसँग समन्वय गरी स्वयंसेवकहरू परिचालन गरिनेछ । आयोजना प्रमुख श्रेष्ठले जिल्लाका ७४ वटै वडाका नागरिकलाई पायक पर्ने र बहुसंख्यक नागरिकको सेयर सुनिश्चित हुनेगरी संकलन केन्द्र स्थापना गरिने बताए । सेयरका बारेमा जानकारी दिन बिक्री प्रबन्धक, नागरिक लगानी कोष र सहायक प्रबन्धक सनराइज क्यापिटल तथा माथिल्लो तामाकोसी आयोजनाले साउन १६ वाट सेयर प्रशिक्षण तथा सूचनामूलक कार्यक्रम सञ्चालन गर्ने निर्णय पनि भएको छ । माथिल्लो तामाकोसी आयोजनामा सेयर आवेदन दिनका लागि सबै नागरिकको डिम्याट खाता नचाहिने भएको छ ।

आवेदनका लागि डिम्याट खाता अनिवार्य नगरिए पनि सेयर लगानीको तीन वर्षपछि भने सबै सेयर होल्डरको अनिवार्य डिम्याट खाता हुनुपर्ने धितोपत्र बोर्डले सुझाव दिएको छ ।

परिवारको कुनै एक सदस्यको बैंक खाता भए सोही खातामार्फत परिवारका सबै सदस्यले सेयर आवेदन गर्न सक्ने आयोजना प्रमुख श्रेष्ठले बताए । राष्ट्रिय गौरवको माथिल्लो तामाकोसी आयोजनाको प्रवद्र्धक कम्पनी तामाकोसी हाइड्रोपावरले दोलखावासीका लागि १ अर्ब ५ करोड ९० लाखबराबरको १ करोड ५ लाख ९० हजार कित्ता सेयर निष्कासन गर्दै छ । सेयर निष्कासनका लागि धितोपत्र बोर्डबाट स्वीकृत लिई लगानी कोषलाई बिक्री प्रबन्धक र सनराइज क्यापिटललाई सहायक प्रबन्धक तोकिएको छ ।

दोलखावासीका लागि यही १६ साउनदेखि १४ भदौसम्मका लागि सेयर आवेदन अवधि तोकिएको छ । तर, सो अवधिमा पर्याप्त सेयर आवेदन नपरे धितोपत्र बोर्डको स्वीकृति लिएर केही अवधिका लागि थप गर्न सकिनेछ । माथिल्लो तामाकोसी आयोजनामा सेयर लगानीका लागि दोलखावासीलाई तीन वर्गमा विभाजन गरिएको छ । आयोजना अति प्रभावित लामाबगर र गौरीशंकरलाई ‘क’ वर्ग, प्रसारण लाइन र प्रवेश मार्गले छोएका वडालाई ‘ख’ वर्ग र बाँकीलाई ‘ग’ वर्गमा राखिएको छ । ‘क’ वर्गले अधिकतम ३ सय कित्ता र ‘ग’ वर्गले न्यूनत ३० कित्ता सेयर खरिद गर्न पाउनेछन् ।

यो सामाग्री पढेर तपाईलाई कस्तो महसुस भयो ?

View all articles by
सोम, साउन १४, २०७५ (July 30, 2018, 7:12 am) मा द्वारा अर्थ / बाणिज्य अन्तर्गत प्रकाशित

प्रतिकृया दिनुहोस

Leave a Reply

Your email address will not be published. Required fields are marked *


फेसबुकबाट प्रतिक्रिया

भर्खरै