काठमाडौँ । सूर्य चुनाव चिन्ह लिएर चुनाव लडेका सांसद हृदयश त्रिपाठी औपचारिक रुपमा नेकपामा प्रवेश गर्ने भएका छन् ।
बिहीबार नेकपाको धुम्वाराहीस्थित पार्टी कार्यालयमा त्रिपाठी लगायत अन्य केही नेता प्रवेश गराउन लागिएको नेकपाले जनाएको छ ।
नेकपाका अध्यक्षद्धय केपी शर्मा ओली र पुष्पकमल दाहालको उपस्थितिमा नेता त्रिपाठी लगायत नेताहरु पार्टीमा भित्र्याउन लागिएको हो । गत निर्वाचनअघि राजपा त्यागेका त्रिपाठी प्रतिनिधिसभाको निर्वाचनमा नवलपरासी–१ बाट विजयी भएका थिए ।
राजपाका तत्कालीन नेताहरु सूर्य चिन्ह लिएर स्वतन्त्र उम्मेदवार बनेका थिए । त्रिपाठीसहित अन्य पार्टीका नेताहरु समेत नेकपा प्रवेश गर्न लागेका हुन् । नेकपाका नेता कृष्णगोपाल श्रेष्ठले बिहीबार विभिन्न नेताहरु पार्टी प्रवेश गर्ने कार्यक्रम रहेको जानकारी दिए ।
