बलात्कारपछि हत्या गरिएकी कञ्चनपुरकी १३ वर्षीया बालिका निर्मला पन्तको न्यायका लागि शनिबार देशभर प्रदर्शन भएको छ ।
पन्तको हत्या भएको ५२ दिन बित्दा समेत राज्यले दोषी पत्ता लगाउन तत्परता नदेखाउँदा शनिबार देशैभर हजारौं संख्यामा विरोध प्रदर्शन भएको हो ।
काठमाडौंको माइतीघरसहित देशका विभिन्न भागमा स्वतःस्फूर्त सयौं संख्यामा निस्किएको विरोध प्रदर्शनमा निर्मलाका वास्तविक हत्यारा पहिचान गरी कारबाही गर्न माग गरिएको छ ।
विरोध ¥यालीका सहभागीहरूले सरकार मौन बसेको भन्दै चर्को रूपमा न्यायको माग गरेका छन् । -यालीका सहभागीले गृहमन्त्री रामबहादुर थापा बादलको राजीनामा माग गरे ।
आजको राजधानी दैनिक लेख्छ– ५२ दिनअघि बलात्कारपछि हत्या गरिएकी निर्मलाको रगतको दाग सरकार र प्रहरीको छविसँग जोडिएको छ । लामो समयसम्म वास्तविक दोषी पत्ता नलागेपछि सरकारी उच्च तहबाटै वास्तविक अपराधी जोगाउने काम भएको आशंका गर्न थालिएको छ ।
प्रहरीले नै दोषीलाई जोगाउने उद्देश्यले प्रमाण नष्ट गर्नु, छानबिन फितलो गर्नु र हत्यारालाई जोगाउन प्रमाण नष्ट गर्नेमाथि सरकारले गतिलो कारबाही नगर्नुले दिन प्रतिदिन सरकारको विरोध बढ्दै गएको हो ।
विगत केही सातादेखि निर्मला हत्या राष्ट्रकै प्रधान मुद्दा बनेको छ । संसद्मा समेत चर्को रूपमा आवाज उठिरहेको छ । तर, प्रहरीले अहिलेसम्म हत्यारा को भन्ने सार्वजनिक गर्न सकेको छैन ।
प्रधानमन्त्री केपी शर्मा ओली र गृहमन्त्री रामबहादुर थापाले निर्मला हत्याका विषयमा दिएका अभिव्यक्ति आफैं विवादित छन् ।
