बहुराष्ट्रिय दातृसंस्था विश्व बैङ्कले नेपालको रणनीतिक सडक सञ्जाल जोड्ने पुल निर्माण गर्न करीब रू. १५ अर्ब ऋण सहयोग गर्ने भएको छ । बैङ्कको मुख्यालय वाशिङ्टनबाट बुधवार जारी विज्ञप्तिमा सो ऋण स्वीकृतिबारे उल्लेख छ । विज्ञप्तिमा नेपालको रणनीतिक सडक सञ्जाल विस्तार हुन राष्ट्रिय राजमार्ग, सहायक मार्ग र अन्य सडक गरी करीब १२ हजार १ सय ४२ किलोमिटर सडक विस्तार हुनुपर्ने र ती सडकलाई आपसमा जोड्न १ हजार ७ सय ७३ पुल निर्माण हुनुपर्ने आवश्यकता औंल्याएको छ ।
अर्थ मन्त्रालयले सडक सञ्जाल विस्तार तथा पूर्वाधार निर्माणको सोही आवश्यकता सम्बोधन गर्ने दोस्रो चरणको पुल सुधार तथा मर्मत संभार परियोजनाअन्तर्गत ऋण सहयोग परिचालन हुने बताएको छ । परियोजनाअन्तर्गत सुरक्षित तथा भूकम्प प्रतिरोधी पुल निर्माण गर्ने र नयाँ प्रविधि प्रयोग भएका इञ्जिनरहित सवारीसाधनको प्रयोगलाई प्राथमिकताका साथ कार्यान्वयनमा लैजाने कार्यक्रम छ ।
विश्व बैङ्कका नेपाल प्रमुख फारिस हदाद जेर्भाेसले पूर्वाधार विकासका लागि बैङ्कको ऋण महत्वपूर्ण हुने बताए । उनले सो ऋणले निर्माण हुने पुलले नेपालीलाई सहज सञ्जालको पहुँचमा पु¥याउने भन्दै यातायात तथा व्यापार क्षेत्रको लागतसमेत घटाउने बताए ।
ऋण सहयोगले विभिन्न सडक तथा राजमार्ग जोड्ने करीब ४ सय ७७ पुल निर्माण र ९० पुल मर्मत सम्भार गर्न पुग्ने ठानिएको छ । त्यसैगरी सोही ऋणबाट नयाँ बनेका २ लेनका ८० पुल र ४ लेनका ३५ पुलको अपग्रेड तथा मर्मत सम्भारसमेत गरिने बताइएको छ । बैङ्कले नेपालको सञ्जाल निर्माणको आवश्यकता सम्बोधन भएपछि आर्थिक वृद्धि बढ्ने अपेक्षा राखेको छ । बैङ्कले पहिलोपटक सन् १९६९ मा दूरसञ्चार परियोजनामा सहयोग गरेको थियो । त्यसयता बैङ्कले विभिन्न परियोजनमा निरन्तर सहयोग दिइरहेको छ । हालसम्म बैङ्कअन्तर्गतका परियोजनामा कुल १ अर्ब ७५ करोड डलर खर्च भएको छ । त्यसमध्येको ३ अर्ब ४८ करोड डलर ऋण सहयोग र १ अर्ब २७ करोड डलर अनुदान सहयोग हो ।
