सप्तरी जिल्लाका विभिन्न परिक्षा केन्द्रमा विद्यार्थीहरुले फेसबुकमा ग्रुप बनाएर च्याटका माध्यमवाट एसईईको चिट चोराउने गरेको पाइएको छ ।
प्रमुख जिल्ला अधिकारी सुरेन्द्र पौडेल सहित बिभिन्न सरकारी अधिकारीहरुको अनुगमन टोलीले जिल्लाका केही परिक्षा केन्द्रहरुमा व्यापक रुपमा अनियमितता भइरहेको जनाएको हो । चिट चोराउने कार्यमा संलग्न भएको आरोपमा सप्तरीमा एक केन्द्राध्यक्ष निकालिएका छन् ।
नक्कली कार्यालय सहयोगी बनेका चार जना र आठजना विद्यार्थीलाई प्रहरीले नियन्त्रणमा लिई दिउँसो कागज गराई छाडेको छ । सप्तरीकै बनरझुलास्थित ककिझौ माध्यमिक विद्यालय परिक्षा केन्द्रका केन्द्राध्यक्ष सहित पाँच जनालाई कानुनी कारवाही सुरु गरिएको छ ।
सो परिक्षा केन्द्रका केन्द्राध्यक्ष रामअवतार गुप्तामाथि कानुनी कारवाही सुरु गरिएको छ । यस्तै नक्कली कार्यालय सहयोगीहरु रामन्दरप्रसाद चौधरी,रामानन्द चौधरी,लगेन्द्रप्रसाद चौधरी र देवनारायण मण्डललाई पक्राउ गरिएको छ । प्रहरीले विभिन्न परीक्षा केन्द्रबाट २५ वटा मोबाइल सकेत बरामद गरेको छ ।
