सफाइमा काठमाडौं महानगरको सक्रियता

सोमवार, अशोज १, २०७५, । 

काठमाडौं महानगरपालिकाले सफा सहर राख्न पाँच ठूला यन्त्र (जेट मेसिन)  सञ्चालनमा ल्याएको छ । यन्त्रको पहिलोपटक प्रयोग गर्दै महानगर प्रमुख विद्यासुन्दर शाक्यले फोहर व्यवस्थापनप्रति जिम्मेवारीबोध गर्ने हो भने थोरै उपकरणले पनि सहरलाई दिगो रूपमा सफा राख्न सकिने बताए ।

महानगरका उपप्रमुख हरिप्रभा खड्गीले नागरिकले महसुस गर्ने गरी सफा सहर बनाउन हतार भइसकेकाले काम गर्ने शैलीमा पनि केही परिवर्तन गर्नुपर्ने धारणा राखिन् । युरो मापदण्ड ४ बमोजिमका जेट मेसिन पाँच हजार लिटर क्षमताका छन् । त्यसमा ४ हजार लिटर सफा पानी र एक हजार लिटर ढलको फोहर पानी अट्ने छुट्टाछुट्टै ट्यांकी छन् । ढल तानेर सानो ट्यांकीमा राखिन्छ भने ठूलो ट्यांकीमा भएको सफा पानीबाट फोहर भएको ठाउँमा सफाइ गरिन्छ । सो जेट प्रयोगमा आइसकेपछि थुनिएको ढल खोल्दा एउटा जेट फोहर तान्न र अर्को जेट सफा गर्न जानुपर्नेछैन ।

जेटमा भएको स्प्रेगनले बिरुवामा भएको धुलो पखाल्न तथा सडकआसपास क्षेत्रमा सफा गर्न सकिन्छ । वडाध्यक्षको अगुवाइमा वडा क्षेत्रमा र केन्द्रको अगुवाइमा उक्त यन्त्रबाट पहिलोपटक रत्नपार्क, रानीपोखरी, बागबजार, पुतलीसडक, भृकुटीमण्डपमा सफाइ गरिएको छ । अघिल्लो साल वैशाखमा स्थानीय तहको निर्वाचनका समयमा जनप्रतिनिधिको पहिलो प्रतिबद्धतामध्ये सुन्दर र सफा सहर पनि थियो ।

यो सामाग्री पढेर तपाईलाई कस्तो महसुस भयो ?

सोमवार, अशोज १, २०७५ (September 17, 2018, 7:32 am) मा द्वारा प्रदेश नं- ३ अन्तर्गत प्रकाशित

प्रतिकृया दिनुहोस

Leave a Reply

Your email address will not be published. Required fields are marked *


फेसबुकबाट प्रतिक्रिया

भर्खरै