प्रदेश ३ मा पर्यटन गुरुयोजनाः झिरघारीमा मैत्री बगैँचा, १० ठाउँमा हिल स्टेशन

बिहिबार, अशोज ११, २०७५, । 

तीन नम्बर प्रदेश सरकारले ‘घुम्न जाऔं दामन’ भन्ने नारासहित मकवानपुरको उत्तरी क्षेत्रलाई समेटेर पर्यटन गुरुयोजना बनाउने भएको छ । यही योजनाअन्तर्गत मकवानपुरको झिरघारीमा मैत्री बगैँचा निर्माणको शुभारम्भ गरिएको छ ।

३९ औं पर्यटन दिवसको अवसरमा बिहीबार मुख्यमन्त्री डोरमणि पौडेलसहित प्रदेश ३ का सात जना मन्त्रीहरुले वृक्षरोपण गरेको बगैँचा निर्माणको शुभारम्भ गरेका हुन् । ‘घुम्न जाऔं दामन’को बोर्डसँगै झण्डत्तोलन पनि गरिएको छ ।

कार्यक्रममा मुख्यमन्त्री डोरमणि पौडेलले भने, ‘विश्व पर्यटन दिवसको अवसरमा प्रदेशको पहिलो कार्यक्रम गरेका छौं । यसको खास महत्व छ । समग्र उत्तरी क्षेत्रलाई समेटेर पर्यटन गुरुयोजना बनाउँछौं ।’

पर्यटन विकासको गुरुयोजनाभित्र २० वर्षअघि स्थापना भएको मैत्री बगैँचा पनि पर्ने छ । बगैँचा व्यवस्थापनका लागि प्रदेश सरकारले २५ लाख र भिमफेँदी गाउँपालिकाले २० लाख रुपैयाँ लगानी गर्ने निर्णय भइसकेको छ ।

कार्यक्रममा उद्योग वन तथा वातावरण मन्त्री अरुण नेपालले प्रदेश सरकारले १० ठाउँलाई छनौट गरी पर्यटकीय गन्तव्य बनाउने जानकारी दिए ।

दामनको सिमभञ्ज्याङबाट चिल्लाङ्गको चन्द्रागिरिसम्म पर्टकीय क्षेत्रको रुपमा विकास गरिने छ । सरकारले १३ जिल्लालाई लक्षित गर्द‌ै १० हिल स्टेसन पनि बनाउने छ । प्रत्येक स्टेसनमा ३ करोड खर्च हुने अनुमान छ ।

मन्त्री नेपालले समृद्धिको पहिलो आधार पर्यटन भएकाले सरकार पर्यटनको विकासमा लागेको बताए ।

यो सामाग्री पढेर तपाईलाई कस्तो महसुस भयो ?

बिहिबार, अशोज ११, २०७५ (September 27, 2018, 12:15 pm) मा द्वारा प्रदेश नं- ३ अन्तर्गत प्रकाशित

प्रतिकृया दिनुहोस

Leave a Reply

Your email address will not be published.


फेसबुकबाट प्रतिक्रिया

भर्खरै