काठमाण्डाै ।
प्रधानमन्त्री ओलीले हिजाे मात्रै संसदमा सम्बोधन गर्दै भारतले मिचेका नेपाली भूभाग फिर्ता ल्याउने तयारीमा रहेको बताए । प्रधानमन्त्रीको यो भनाइलाई आजको कान्तिपुर दैनिकको मुख्य समाचारले काउन्टर दिएको छ । कान्तिपुरका अनुसार महाकाली नदी वारी भारतले सडक खनेको छ ।
उत्तरी सीमा व्यास क्षेत्रमा भारतले नेपाल भूमीमै आएर करिब आधा किलोमिटर सडक खनेको समाचारमा उल्लेख छ । ब्यास गाउँपालिका-१ को माल्पादेखि दोपखेसम्मको भागमा डोजर गुडाउने सडक, महाकाली नदी तार्न पुल र दुई काठेपुल भारतले बनाइसकेको छ ।
‘भारतले नेपाली भूमिका दुई ठाउँमा सडक बनाएर निर्माण सामाग्री ढुवानी गरिरहेको छ,’ समाचारमा लेखिएको छ, ‘व्यास गाउँपालिका-१ र २ वडाको सीमा क्षेत्र बयलीधारबाट करिब एक किलोमिटरमाथि झण्डै १५० मिटर सडक खनेर भारततर्फ लगिएको छ ।
त्यहाँबाट २५० मिटरमाथि गएर फेरि नेपाली भूमिमै आएर ३०० मिटर सडक खनेको छ । भारतले सीमा नदी महाकाली किनार हुँदै तिब्बत सीमा लिपुलेक जोड्ने सडक निर्माण गरिरहेको छ ।’
