पोखरा प्रिमियर लिग : टोली, मालिक र मार्की प्लेयर सार्वजनिक

कात्तिकको दोस्रो साताबाट पोखरामा सुरु हुने टीट्वेन्टी फ्रेन्चाइज क्रिकेट प्रतियोगिता पोखरा प्रिमियर लिग (पीपीएल) का टोली, तीनका मालिक र मार्की प्लेयर सार्वजनिक गरिएको छ । आयोजक क्विन्स इभेन्ट्स म्यानेजमेन्टले बिहीबार एक कार्यक्रमबीच प्रतियोगितामा सहभागी हुने ६ वटै टोलीको नाम, तिनका मालिक र मार्की प्लेयर सार्वजनिक गरेको हो । पीपीएल कात्तिक ९ देखि २० गतेसम्म हुँदैछ ।

प्रतियोगितामा हुलास काठमाडौं रोयल्स, पोखरा पल्टन, विराटनगर टाइटन्स, चितवन राइनोज, बुटवल ब्लास्टर र एक्पर्ट धनगढी ब्लुजले सहभागिता जनाउने छन् । हुलास काठमाडौं रोयल्सको स्वामित्व राज्यलक्ष्मी गोल्छाले लिएकी छिन् भने टोलीको मार्की प्लेयरमा राष्ट्रिय टोलीका उपकप्तान ज्ञानेन्द्र मल्ल छनोट भएका छन् ।

पोखरा पल्टनको स्वामित्व विनायक पोखरेलले लिएका छन् भने टोलीले शरद भेषवाकरलाई मार्की प्लेयर छानेको छ ।

यसैगरी विराटनगर टाइटन्सको स्वामित्व पूर्वक्रिकेटर तथा व्यवसायी पारस लुनियाले लिएका छन् भने टोलीको मार्की प्लेयर सन्दीप लामिछाने रहेका छन् । चितवन राइनोजको स्वामित्व युवा व्यवसायी रेसम (राहुल) महराले लिएका छन् भने राष्ट्रिय टोलीका कप्तान पारस खड्का मार्की प्लेयरका रूपमा छन् । बुटवल ब्लास्टरको स्वामित्व रामबहादुर विष्टले लिएका छन् भने रोमपाल कामी मार्की प्लेयर छन् । एक्पर्ट धनगढी ब्लुजको स्वामित्व सञ्जीव शर्माले लिएका छन् भने टोलीले मार्की प्लेयरमा दीपेन्द्रसिंह ऐरी रहेका छन् ।

आयोजकले प्रतियोगितामा सहभागी टोलीको स्वामित्व बेच्दा र मार्की प्लेयर अनुबन्ध गर्दाको रकम भने खुलाएको छैन । प्रतियोगितामा सहभागी सबै टोलीले बिहीबार नै आफ्नो लोगोसमेत सार्वजनिक गरे । कार्यक्रममा टोलीको स्वामित्व खरिद गरेका सबैले पीपीएलसँग जोडिन पाउँदा खुसी लागेको प्रतिक्रिया दिए । उनीहरूले आफ्नो सहभागिताले नेपाली क्रिकेटको विकासमा टेवा पुगोस् भन्ने उद्देश्यले लगानी गरेको बताए । राष्ट्रिय टोलीका कप्तान पारस खड्काले पीपीएलको आयोजना नेपाली क्रिकेटरको विकासमा कोसेढुंगा सावित हुने बताए ।

आयोजक क्विन्स इभेन्ट्स म्यानेजमेन्टका प्रबन्ध निर्देशक छुम्बी लामाले नेपालमा प्रचुर सम्भावना भएको पर्यटन क्षेत्रसँग जोडेर नेपाली क्रिकेटको विकासमा योगदान पु¥याउने उद्देश्यले पीपीएलको परिकल्पना गरिएको बताए । कार्यक्रममा उपस्थित युवा तथा खेलकुदमन्त्री जगतबहादुर सुनारले प्रतियोगिताका लागि सरकार र आफ्नो तर्फबाट आवश्यक सबै सहयोग रहने आश्वासन दिए ।

यो सामाग्री पढेर तपाईलाई कस्तो महसुस भयो ?

View all articles by
शुक्र, अशोज १२, २०७५ (September 28, 2018, 12:33 pm) मा द्वारा खेलकुद अन्तर्गत प्रकाशित

प्रतिकृया दिनुहोस

Leave a Reply

Your email address will not be published. Required fields are marked *


फेसबुकबाट प्रतिक्रिया

भर्खरै