विश्व्यापी महामारी कोरोना भाइरस (कोभिड-१०) बाट शुक्रबार मात्रै ६२ हजार बढी संक्रमित भेटिएका छन्। सबैभन्दा बढी अमेरिकामा हिजो झण्डै १७ हजार नयाँ संक्रमित भेटिए।

योसँगै अमेरिकामा संक्रमित हुनेको संख्या १ लाख २ हजार पुगेको छ। यो विश्वको सबैभन्दा धेरै संख्या हो। अमेरिकामा हालसम्म ६ लाख ८५ हजार मानिसमा कोरोना परीक्षण गरिएको उपराष्ट्रपति माइक पेन्सले बताएका छन्। इटलीमा अहिलेसम्म ८६ हजार ४ सय संक्रमित भेटिएका छन्। चीनमा ८१ हजार ३ सय ४० संक्रमित भेटिएकामा झण्डै ७५ हजार निको भइसकेका छन्।

त्यस्तै ३ हजार २ सय ९२ जनाको एक दिनमै मृत्यु भएको छ। कोरोना संक्रमणबाट सबैभन्दा बढी इटलीमा ९ हजार १ सय मानिसको मृत्यु भएको छ। इटलीमा कोरोना संक्रमित १ सय २ वर्षीया महिला उपचारपछि निको भएकी छन्। उत्तरी जेनोआ सहरकी ती महिला २० दिन अस्पतालमा बसेर उपचार गराएपछि निको भएकी हुन्। उनले हिजो १ सय २ वर्षको जन्मदिन मनाएकी छन्।

स्पेनमा ५ हजार १ सय बढीको मृत्यु भएको छ भने संक्रमितको संख्या सबैभन्दा धेरै रहेको अमेरिकामा मृत्यु हुनेको संख्या झण्डै १ हजार ६ सय पुगेको छ। फ्रान्समा ३२ हजार संक्रमित भेटिँदा १ हजार ९ सय भन्दा बढीको मृत्यु भएको छ। बेलायतमा मृत्यु हुनेको संख्या साढे ७ सय पुगेको छ।

हिजो एकै दिन सबैभन्दा धेरै इटलीमा ९ सय १९ जनाको मृत्यु भएको छ भने स्पेनमा ७ सय ७३ जनाको मृत्यु भएको छ। यो सँगै विश्वभर हिजो ३ हजार भन्दा बढीको मृत्यु भएको छ।