अमेरिकी राष्ट्रपति डोनाल्ड ट्रम्पले अमेरिकाको घनिष्ट मित्र राष्ट्र साउदी अरबका नेतृत्वको अपमान गरेको आफैले सार्वजनिक गरेका छन् । आफ्ना समर्थकहरुको भेलामा ट्रम्पले साउदी अरबका राजा सलमानलाई अमेरिकी सैन्य सहयोग बिना ‘दुई हप्ता पनि’ सत्तामा टिक्न नसक्ने बताएको खुलासा गरेका हुन् ।
पश्चिमा मिडियाहरुले ट्रम्पको भनाई गैरकुटनीतिक टिप्पणी भनेर आलोचना गरेका छन् ।
“हामीले साउदी अरबलाई रक्षा गर्छौँ । तपाईंहरु उसलाई सम्बृद्ध छ भन्नु होला र म पनि राजा सलमानलाई मन पनि पराउँछु । तर मैले राजालाई ‘तपाईंहरुलाई हामीले रक्षा गरिरहेका छौँ भनिदिएँ ।”
मिस्सिसिपी राज्यको साउदभेनमा भएको ¥यालीलाई सम्बोधन गर्ने क्रममा ट्रम्पले थप भने, “हामी बिना तपाईंहरु दुई हप्ता पनि टिक्नुहुँदैन । तपाईंहरुले आफ्नो सेनाको खर्च आफैले गर्नुपर्छ ।”
तर ट्रम्पले साउदी राजालाई यस्तो टिप्पणी कहिले गरेको भन्ने बारेमा भने केही बताएनन् ।
यी कटु शब्दहरुको वावजुद ट्रम्प प्रशासनको साउदी अरेबीयासँग राम्रो सम्बन्ध रहेको छ । अमेरिकाले साउदीलाई उक्त क्षेत्रमा इरानको बढ्दो महत्वकांक्षा विरुद्धको आफ्नो साहारा ठान्ने गरेको छ ।
ट्रम्पले राष्ट्रपति भएपछिको आफ्नो विदेश भ्रमण साउदी अरबबाट शुरु गरेका थिए ।
ट्रम्पले शनिवार मात्रै साउदी राजा सलमानलाई फोन वार्ता गरेको समाचार आएको थियो । साउदी समाचार एजेन्सी एसपीएका अनुसार दुई देशका नेताहरुले तेल बजारको स्थीरता सुनिश्चित गर्नेबारे र विश्वको आर्थिक वृद्धीबारेमा कुरा गरेका थिए ।
साउदी अरेबिया संसारको सबैभन्दा ठूलो तेल निर्यातकर्ता राष्ट्र हो । यही आधारमा यो स्वतः ओपेकको नेतृत्व राष्ट्र पनि हो ।
ट्रम्पले यो संस्थाको तेलको मुल्य उच्च राख्न रहेको भूमिकाको विभिन्न समयमा आलोचना गर्ने गरेका छन् ।
संयुक्त राष्ट्र संघको महासभामा बोल्ने क्रममा अघिल्लो महिना ट्रम्पले ओपेक सदस्यहरुले ‘बाँकी विश्वलाई ठगिरहेको’ बताएका थिए ।
‘हामी यीमध्ये धेरै जसो देशहरुको बिनाकारण प्रतिरक्षा गरिरहेका छौँ । अनि उनीहरु हामीहरुलाई नै तेलको उच्च मूल्य लगाएर हामीहरुको फाइदा उठाइरहेका छन् । यो राम्रो होइन । हामी उनीहरुले मूल्यवृद्धी रोकुन् भन्ने चाहन्छौं । हामीहरु उनीहरुले मुल्य वृद्धी कम गर्न शुरु गरुन् भन्ने चाहन्छौँ,’ ट्रम्पले भने ।
उनले अन्य अमेरिकी मित्र राष्ट्रहरु जापान, दक्षिण कोरिया र जर्मनीलाई पनि आफ्नो सुरक्षा खर्च बढाउन दबाब दिइरहेका छन् ।
