बार्सिलोनाका सुपर स्टार लियोनल मेस्सीले आफ्ना पूर्व सहकर्मी नेमार बार्सिलोना फर्किएको हेर्न आफु आतुर रहेको बताएका छन् । अहिले क्रिसमस बिदामा रहेका मेस्सीले स्पेनिस पत्रिका ‘मार्सा’ सँग कुरा गर्दै नेमारको बार्सिलोना फर्किने सम्भावनाबारे खुलासा गरेका हुन् ।
दुईबर्षअघि किर्तिमानी रकममा फ्रेन्च क्लब पेरिस सेन्ट जर्मन (पीएसजी) मा आवद्ध भएका नेमार पहिला मेस्सीको छायाँमा परेर बार्सिलोना छाडेको हल्ला थियो । अहिले नेमार पीएसजीमा खुशी नरहेको र बार्सिलोना फर्कन एजेन्ट मार्फत सल्लाह गरिरहेको खबर बाहिरिएका छन् ।
मेस्सीले पनि नेमारको बार्सिलोना फिर्ती सम्भव भएको बताएका छन् । ‘नेमार बार्सिलोना फर्कन सक्नेछन् । त्यो प्रक्रिया भने निकै कठिन छ,’ मेस्सीले भने । नेमारलाई फर्काउने विषयमा बार्सिलोनाका मिडफिल्डर आर्थर मेलोले पनि हालै खुलासा गरेका थिए । आर्थरले त नेमारलाई फर्काउन आफुले प्रार्थना गरेको समेत बताएका थिए ।
मेस्सीले नेमार बार्सिलोना आउन् भनेर सबैले चाहेको पनि बताए । ‘उनी फर्किउन् भन्ने त हामी सबै चाहन्छौं । यहाँको ड्रेसिङ रुम र लकरले पनि नेमारलाई सम्झिरहेको छ जस्तो लाग्छ,’ मेस्सीले भने । मेस्सीले नेमार र आफु मिल्ने साथी भएको र महत्वपूर्ण क्षण सँगै बिताएको पनि बताए । नेमार बार्सिलोना आउन सक्ने भएपनि पेरिसले उनलाई सजिलै छाड्नेमा मेस्सीलाई विश्वास छैन ।
मेस्सीले नेमार मात्र होइन आफु फेरी बार्सिलोनाका पूर्वप्रशिक्षक पेप ग्वार्डिओलासँग पनि काम गर्न इच्छुक भएको बताए । ‘पेपलाई फर्किन कठिन हुन सक्छ । तर, मलाई उनीसँग काम गर्न पाए हुन्थ्यो भन्ने लागिरहेको छ,’ मेस्सीले थपे ।
मेस्सीले खेलसँगै आफ्ना लागि परिवार सबैभन्दा महत्वपूर्ण भएकोले परिवारसँग खुशी साटिरहेको बताएका छन् । तीन छोराका बाबु मेस्सीले अझै आफु अर्को सन्तानको प्रतिक्षा रहेको खुलासा पनि गरेका छन् ।एजेन्सी
