कैलालीको चुरे गाउँपालिका वडा नम्बर ३ सहजपुरमा माघ २१ गते शनिबार एक दिने निःशुल्क स्वास्थ्य शिविर हुने भएको छ । बसर युवा क्लब कैलालीको आयोजनामा शिविर सञ्चालन हुने भएको हो ।
शिविरमा पाठेघरको समस्या तथा आङ खस्ने समस्याको उपचार, महिनावारीमा गडबडी, स्तनमा गाँठागुठि र निसन्तान तथा बाँझोपन सम्बन्धी लगायतका महिलाहरूमा देखिने समस्याको उपचार गरिने छ । साथै हातखुट्टा झमझमाउने, दुख्ने र आँखाको चेकजाँच गर्ने र साथै मोतिबिन्दुको निःशुल्क अप्रेशन गर्नुका साथै सुगर पनि निः शुल्क चेकजाँच गरिने बसर युवा क्लबका अध्यक्ष गणेश देउवाले जानकारी दिए ।
शिविरमा बरिष्ठ स्त्री तथा प्रसुती रोग बिशेषज्ञ डा. रोजी शर्मा, जनरल फिजिसियन डा. शिलु उप्रती, जनरल फिजिसियन डा. भुवन ओझा, हेल्थ असिस्टेण्ट कुबेर खड्का र बिएससी नर्सिङ प्रियंका शर्माले चेकजाँच गर्ने अध्यक्ष देउवाले बताए ।
शिविर नोभा हस्पिटल, गेटा आँखा अस्पताल, चुरे गाउँपालिका, बास नेपाल कैलाली शाखा, गुराँस एकेडेमी अत्तरिया कैलाली र दारी ग्याङ कैलाली शाखाको सहकार्यमा संचालन हुने भएको छ ।
