बेसीसहर ।: रेविज संक्रमणबाट एक बालकको मृत्यु भएपछि लमजुङ सदरमुकाम बेसीसहरमा भुस्याहा कुकुर मार्न थालिएको छ ।

बेसीसहर नगरपालिकाले सरोकारवालाहरुसँग समन्वय गरी सदरमुकाम भित्रका भुस्याहा कुकुर मार्न थालेको हो । रेविज संक्रमित कुकुरको टोकाइबाट केही दिनअघि बेसीसहर बस्दैआएका मस्र्याङ्दी गाउँपालिका–३ खुदीका १२ वर्षीय सोदिप तामाङको मृत्यु भएको थियो ।

रेविज संक्रमित कुकुरले अन्य बालकालिकालाई पनि टोक्न थालेपछि भुस्याहा कुकुर मार्न थालिएको नगरपालिकाले जनाएको छ । बेसीसहर बजारमा रातिको समयमा टोली परिचालन गरी विष खुवाएर सडकमा भेटिएका कुकुरहरु मार्न थालिएको छ ।

नगरपालिकाका अनुसार बेसीसहर बजारभित्रका दर्जनभन्दा बढी कुकुरहरुलाई विष खुवाएर मारिसकिएको छ । भुस्याहा कुकुरहरुको व्यवस्थापनका लागि समुदायस्तरबाट नै आग्रह गरेपछि सरोकारवालाको समन्वयमा कुकुर व्यवस्थापन गर्न थालिएको बेसीसहर नगरपालिका प्रमुख गुमानसिंह अर्यालले बताए ।

‘शंकास्पद भुस्याहा कुकुरहरुलाई मार्ने र अन्य शंका नभएका कुकुरहरुलाई रेविज सुइ लगाएर छोडेका छौँ’, नगरप्रमुख अर्यालले भने । कुकुरको टोकाइबाट रेविज संक्रमण भएका बालकको मृत्यु भएपछि रेविजको संक्रमण अन्य धेरैसँग हुनसक्ने भन्दै सर्वसाधरणमा त्रास फैलिएको छ । पछिल्लो समय रेविज संक्रमणको डरले ४० जना भन्दा बढीले जिल्ला अस्पतालमा पुगेर रेविज विरुद्धको खोप लगाइसकेका छन् ।

नगरपालिकाले बेसीसहरस्थित घरपालुवा कुकुरलाई सुरक्षित रुपमा घरमा राख्न आग्रह गरेको छ । घरपालुवा कुकुरलाई रेविज विरुद्धको सुइ अनिवार्य लगाउन नगरपालिकाले सूचना जारी गरेको छ । घरपालुवा कुकुरले टोकी कुनै दुर्घटना भएमा घरधनी जिम्मेवार हुने समेत नगरपालिकाले चेतावनी दिएको छ ।

नगरपालिकाले रेविज लागेका शंकास्पद कुकुरलाई नियन्त्रण तथा व्यवस्थापन गर्न टोली परिचालन गरेको छ । घरपालुवा कुकुर धनीले अनिवार्य रुपमा कुकुर पालेको जानकारी नगरपालिकाको पशु सेवा शाखामा जानकारी गराउनुपर्ने पनि नगरपालिकाले जनाएको छ । नगरपालिकाको सूचनापछि भेटेरिनरी अस्पताल तथा पशुसेवा विज्ञ केन्द्रमा पुगेर ३० बढी घरपालुवा कुकुरहरुलाई रेविज विरुद्धको सुइ लगाइसकिएको छ ।