खै महिनौं हात बाँधेर बस्दा कसरि जिइन्छ ।
बालकदेखि बृद्धसम्म के खाइन्छ, के पिइन्छ ।
मन्दिरका घन्टिहरु उता कानेखुशी गर्दा हुन्,
आजकल बिहान बिहानै आराम किन लिइन्छ ।
कौशिका बिरुवाहरु आफैंमा छक्क पर्दा हुन्,
आजकाल समय अगावै मलपानी किन दिइन्छ ।
बाथरुमका चप्पलहरु त्यस्तै साउती गर्दा हुन्,
आजकल छिटो छिटो यो तलुवा किन खिइन्छ ।
रक्सीका बोत्तलहरु घरभित्रै गुन्गुनाउँदा हुन् ,
आजकल एक्लै एक्लै यति धेरै किन पिइन्छ ।
भान्छाका भाँडाकुँडा चाहिं चिन्ता गर्दा हुन्,
कुन दिन यी सबै मानिसहरुको मुख सिइन्छ ।
खै महिनौं हात बाँधेर बस्दा कसरि जिइन्छ ।
बालकदेखि बृद्धसम्म के खाइन्छ, के पिइन्छ ।
- हरि अधिकारी
