बैंक अफ काठमान्डूको १३.२५% बोनस सेयर हात पार्न पहिला कर तिर्नुभर्ने भएको छ । बोनसमा लाग्ने कर तिरेपछि मात्र लगानीकर्ताको डिम्याट खातामा बोनस सेयर पठाइने बैंकले जानकारी गराएको छ । बैंकले २०७३ असार ३१ देखि २०७५ असार ७ गतेसम्म सेयर खरिद गरेकाहरुले बोनस पाउन कर तिर्नुपर्ने उल्लेख गरेको छ ।

लगानीकर्ताले बैंक अफ काठमान्डूको खाता नम्बर ३६००००३६००१२ कर जम्मा गर्नुपर्नेछ । अनि मात्र सम्बन्धित सेयरधनीको डिम्याट खातामा बोनस सेयर जम्मा हुनेछ । गत असार ७ गतेसम्म आफ्नो सेयर अभौतिकरण गराइसकेका सेयरधनीको भने डिम्याट खातामा बोनस सेयर जम्मा गरिसकिएको बैंकले जानकारी दिएको छ ।

असार ७ गते भन्दापछि डिम्याट गराएकाहरुको पनि बोनस सेयर खातामै जम्मा गरिदिने तयारी भइरहेको बैंकको भनाई छ ।
तर, हालसम्म पनि सेयर डिम्याट नगराउनेहरुलाई बैंकले छिटो गर्न आग्रह गरेको छ । आफूलाई पायक पर्ने निक्षेप सदस्य वा सेयर रजिष्ट्रार नबिल इन्भेष्टमेन्ट बैंकिङ लिमिटेड नक्साल काठमाडौंमा गएर गर्न डिम्याट गर्न सकिनेछ ।

बैंकको गत असार २८ गते सम्पन्न वार्षिक साधारण सभाले अघिल्लो वर्षको कमाईबाट १३.२५% बोनस सेयर वितरण गर्ने प्रस्ताव पारित गरेको थियो । हाल यस बैंकको चुक्ता पुँजी ७ अर्ब ७ करोड २८ लाख ९६ हजार रुपैयाँ रहेको छ । गत असार मसान्तसम्ममा बैंक अफ काठमान्डूले १ अर्ब ३३ करोड ३७ लाख ९८ हजार रुपैयाँ खुद नाफा कमाएको छ ।