काठमाडौँ : इन्डोनेसियामा भइरहेको १८औँ एसियाडमा पदकको खडेरी तोड्दै नेपालले रजत पदक जितेको छ। प्याराग्लाइडिङअन्तर्गत पुरुष टिम क्रस कन्ट्री विधामा नेपालले बुधबार रजत पदक जितेको छ।
स्वर्ण जितेको जापानभन्दा नेपाल २७ अंकले मात्र पछि पर्यो। यस्तै आयोजक इन्डोनेसियाले कास्य जित्यो।
पाँच राउण्डमा भएको स्पर्धामा नेपालले कूल ११ हजार ३६४ अंक जोड्दा जापानले ११ हजार ३९१ अंक जोडेको थियो।
नेपाली टिममा विमल अधिकारी, विजय गौतम, युकेश गुरुङ, सुशील गुरुङ र विशाल थापा थिए।
प्याराग्लाइडिङमा रजत जितेपछि नेपाल पदकतालिकामा समेत समावेश भएको छ र ३२औँ स्थानमा छ। अहिलेसम्म १०० स्वर्ण जित्दै चीन पहिलो तथा जापन ४८ स्वर्णका साथ दोस्रो स्थानमा छ।
नेपालको लागि एसियाडमा पदक जित्ने प्याराग्लाइडिङ चौथो खेल हो। यसअघि नेपालका लागि तेक्वान्दो, बक्सिङ र करातेले पदक दिलाएको थियो। यस पटक भने यी खेलले रित्तो हात फर्केको छ।
