काठमाडौँ : नेपाल एसिया कप छनोटअन्तर्गत पहिलो खेलमै ओमानसँग ७ विकेटले पराजित भएको छ।
मलेसियाको क्वालालम्पुरस्थित बायुमास ओभलमा भएको खेलमा नेपालले दिएको २२२ रनको लक्ष्य ओमानले १२ बल बाँकी छदै ३ विकेट गुमाएर पुरा गरेको हो।
ओमानका लागि खावर अलीले नटआउट रहदै सर्वाधिक ८४ रन बनाए भने जिसन मक्सुद ४५ रनमा नटआउट रहे। यस्तै वैभव वाटेषाओनकरले ४१ र जतिन्दर सिंहले ३० रन जोडे। नेपालका लागि कप्तान पारस खड्काले मात्र १ विकेट लिए। ओमानका २ खेलाडी रनआउट भएका थिए।
टस हारेर पहिले ब्याटिङ गरेको नेपालले निर्धारित ५० ओभरमा ९ विकेट गुमाएर २२१ रन बनाएको थियो।
नेपालको लागि सागर पुनले सर्वाधिक ८३ रन बनाए। यस्तै उपकप्तान ज्ञानेन्द्र मल्लले ४५ तथा आरिफ शेखले ३६ रन जोडे। करण केसीले नटआउट २६ रन जोडे। बलिङमा ओमानका बिलाल खान, मोहम्मद नदिम र अजय लाचेटाले २-२ विकेट लिए।
नेपालले अब दोस्रो खेलमा ओली युएईसँग खेल्नेछ। युएईले आज भएको खेलमा सिंगापुरलाई २१५ रनले पराजित गरिसकेको छ। अर्को खेलमा आयोजक मलेसियाले ३ विकेटले हङकङलाई हरायो।
